Авторот на романот „Хотел меѓу две војни“, Александар Русјаков, ќе биде гостин на Градската библиотека „Браќа Миладиновци“ во Скопје, вечерва во 19 часот во спомен-собата „Т’га за југ“. Разговорот со Русјаков ќе го води книжевната критичарка Александра Јуруковска, а фрагменти од делото ќе чита актерот Андреј Серафимовски.
„Хотел меѓу две војни“, издание на „Арс Либрис“, дел од „Арс Ламина“ е историографска метафикција посветена на култната љубовна приказна за Мустафа Кемал Ататурк и Елени Каринте. Прикажани во вителот на бурните историски настани на Балканот и во Европа (пред сè, многубројните војни од првата половина на ХХ век), судбините на Мустафа и Елени се претставени преку вештите меандрирања помеѓу биографските факти и многубројните реминисценции и психолошки портретирања на ликовите.
„Хотел меѓу две војни“ е добитник на наградата „Пегаз“ за најдобар необјавен роман во 2021 година и на Рациновото признание во 2022 година.
Александар Русјаков е роден во 1970 година во Велес. Пишува поезија, раскази, драми, а „Хотел меѓу две војни“ е негов петти роман. Автор е на сценарија за повеќе кратки ТВ-филмови и серии, за долгометражни играни и документарни филмови, како и на анимираната ТВ-серија „Еднооки“.
Разговорот е дел од големата кампања на нашата библиотека #ЧитамеСовремениМакедонскиАвтори, а „Хотел меѓу две војни“ ќе биде тема и на Клубот на читатели предвиден за 25 февруари.
